Hei ngā rā rua tekau mā rima, ka whakarewaina te kiriata nei a Mt Zion ki te ao whānui. Ko te mea ohorere koirā hoki te wā tuatahi ka kitea e ngā whetu i te katoa o te whakamutunga hoki o tā rātou kiriata. Ko tā te whetu rongonui a Stan Walker e hīkaka katoa ana tōna wairua, heoi kei reira anō ngā pūrerehua e rere haere ana i tōna puku. He orite hoki ngā whakaaro o tōna hoa a Temuera Morrison, ko tāna he awangawanga anō tāna, engari ko te mea nui i whakapeto ngoi te katoa o te tira ki te tutuki i taua kaupapa.
Ko Turei te pū o te kiriata, koia tā Stan Walker e whakaari ana. Ko te whai i ngā tapuwae o tētahi kaiwaiata tōna wawata. Heoi, mo tōna pāpa, a Temuera, ko te mahi rīwai me tōna whānau te aronga tika mōna. Ko tā Walker ko te tino ito o te kiriata rā ko te whanaungatanga me te wairua aroha ki waenganui i a Turei me tōna pāpa.
Māmā noa iho te pōhehe a ētahi he tohunga kē a Walker ki ēnei mahi kaiwhakaari, heoi koinei te kiriata tuatahi mōna, ā e whakapono ana ia ka rongo ia i ngā whakaaro a te marea mo āna mahi a te putanga o te kiriata nei ki te ao whānui.
I tōna whai wāhi ki te katoa o te kiriata nei ko te mea nunui rawa kia Stan ko te whai wāhi anō ki nga hapori Māori o Aotearoa, ki te kōrero i tōna reo, ko te whakaaro hoki mo ngā tikanga o te ao Māori, ko tāna he uaua rawa te whai i ēra kaupapa mēnā ko Ahitereiria tō wāhi noho.
Ka whakarewaina te kiriata hei te tuawhā o te marama e tū mai nei, hei te tuaono, ka tūwhera ai ki te marea.
Kairīpoata: Rahia Timutimu.