Kō atu i te 20 tau mai anō i te whānautanga mai o te haki Tino Rangatiratanga ki te ao mārama. Ko tā Rangitaane Marsden ko te rā o te whānautanga mai ko te tua ono of Pepuere i te tau 1990.
Mea rawa ake kua rata mai te motu whānui ki a ia, me te rere i te haki ki ngā wāhi rongonui o Aotearoa.
Ko tā Rangitaane Marsden “e whakatau ana te haki i ngā kōrero o te orokohanga mai o te ao, engari mēna ka aro pēnei koe, he rerekē anō te tirohanga, a kei tēnei wāhanga o te pango ka kitea te pūmanawa o te tāngata, i te wāhanga whero e whakatau ana i te mātauranga i te māramatanga o te tāngata”.
I toko ake te whakaaro mō tēnei tohu Māori i te whakataetae haki i whakahaerehia e te rōpu porotēhi a Te Kawariki. Ko āna kaihanga, ko Hiraina Marsden, ko Jan Dobson, rātou ko Linda Munn. Ko Pou Erstich te kaiwhakamāori. Ko te whānau Marsden tērā e tiaki tonu nei i te mauri o te haki.
I te marama o Oketopa, i tāmokongia e te iwi o Ngāi Takoto tō rātou whakatauanga tiriti ki Rangiāniwaniwa i Te Hiku o te Ika. I taua rā tonu i whakamānutia e rātou te Hiraina Marsden Karahipi mō ngā mahi toi, he tohu mātauranga mo te kaihanga nei o te haki Tino Rangatiratanga.
Hei te rā o Waitangi, ka kapakapa rā te haki Tino Rangatiratanga mai i te Piriti o Tāmaki Makaurau, me ngā pito maha o te motu.
Kairīpoata: Harata Brown.