E rua tekau mā toru tau te pakeke o Robert Epapara, i mate i te hinganga o tētahi rākau ki runga i a ia, i te wā e mahi ana ia i runga i ngā whenua o Ngāti Rongomai, o Ngāti Pikiao.
Koinei te huarahi i takahia ai e Robert Epapara me tona ope tua rākau, ia ra. Nā whai anō, ko tōna rironga atu e tihaehae manawa ana.
E ai ki tōna kaiwhakahāere a Keith Travers, “he toa ki te mahi, a, he hoa pai, i a ia nga pukenga tinana, he toki mo te takaro riiki, ngakau ngawari hoki.”
He tangata i ngakaunuihia e tana ope ngahere, no tēnei rohe tonu ia, no Ngati Rongomai, Ngati Pikiao. Ko ōna pakeke i whakakotahi mai ki te tuku karakia ki runga ki te wāhi o aituā.
I te timatanga o tenei tau e rua nga aitua penei i pā ki roto o Te Waiariki, tētahi pā tata ki Whakatane, ā, tētahi atu pā tata ki te huarahi matua mai i Ahuriri ki Taupo.
Aurere ana te whakahau a te kaiwhakahaere o te ope nei ki ngā kaimahi ngahere, kia āta tiaki i a rātou anō.
Ka haria atu te tupapāku o Robert Epapara ki Apumoana Marae, ki Te Ngae, tangihia ai.