Kua whakaingotia te uri o Te Whakatōhea a Piri Weepu ki te kapa Opango mo ngā tukinga ki a Aketina me Awherika ki te Tonga hei te rua wiki e hāere ake nei, ko te whakakapi tera i te tunga kua mahue mai i te poutoko nei no te kapa Lions o Te Whanganui-ā-Tara TJ Perenara.
Kua tohua te ika haehae nei a Piri Weepu ki te Kapa Ōpango, ao ake i te wharanga waewae māui o TJ Perenara.
Kei Te Whanganui-ā-Tara a Piri i tēnei wā, e māuiui ana tana tamaiti, ā, whai muri i te tūrakitanga o tana kapa Tāmaki Makaurau i te tira Taniwha he whā tekau mā tahi ki te tekau o te whakataetae Ipu ITM inapō rā ki te Taiwhanga o Eden, i hoki atu ia ki Te Whanganui-ā-Tara kia noho tahi ai me tōna whānau.
He whitu wiki ki muri i riro atu te tūranga o Weepu i te kapa Ōpango ki a Perenara me te aha, i pōhēhētia etahi kua tō te rā ki tōna umanga tākaro me te kapa matua o te motu. I taua wā rā i puta te kōrero a te kaiako, a Steve Hansen, ki te whara tētahi o te hunga poutoko, ka whai urunga anō a Weepu ki roto i te kapa.
Inaiānei ka aro atu a Weepu me te kapa Ōpango ki tō rātou hoariri tuatahi, ki a Āketina, ā, hei te ahiahi āpōpō hui atu ai te kapa ki te taunga waka rererangi o Tāmaki Makaurau, ki kona wehe atu ai ki Āketina.