Nō te kapa Poipapa mā ngā kaitākaro rua tekau mā tahi tau heke iho o Aotearoa te māngari nui, kua whai urunga rātau ki te whakataetae Poipapa o te ao ki Taiwan.
He tuatahitanga tēnei mō te kapa, ā, i haere atu a Te Kāea ki tā rātau whakangungu whakamutunga i mua i tā rātau rere atu ki tāwāhi.
I tīpakohia ēnei kaitākaro e ētahi o ngā kaiārahi, kaiako hoki o Poipapa Aotearoa nā runga i ō rātau pūkenga, mahi tākaro hoki.
Mō te nuinga, koinei te wā tuatahi kua tākaro rātau i tēnei taumata, ki waho atu i Aotearoa, ā, e ai ki te kaiako, ki a Riki Paewai, kāre he akoranga i tua atu i tēnei.
Ka pakanga atu rātau ki ngā toki poipapa o te ao o tēnei reanga, ā, e whakapono ana a Paewai kei ēnei kaitākaro ngā pūkenga hei whakahinga i te hoariri.
He tau momoho tēnei mō Poipapa Aotearoa. Kua tae kē ō tātau kapa ā-motu katoa ki a rātau ake whakataetae ā-ao.
E kitea ana te whanake haeretanga o te hākinakina nei, e rongo hoki ana i te rikarika kia whai tonu i te poipapa a ngā rā kei tua.