Taka mai ki tēnei wā, kua kore he kōrero ki te mana whenua mō ngā keri ki tōna rohe kainga.
Koinei te ia o ngā kōrero i te rā tuatahi o te nohonga a te Taraipiunara o Waitangi ki te whakarongo ki ngā take a ngā hapū o Whangarei.
Nō tērā atu rautau tīmata ai te keri koura me te hiriwa ki ngā whenua o Ngāti Hau. Nāreira kua roa kē te iwi e tatari ana kia tuku i a rātou nā kōrero ki te aroaro o tēnei Taraipiunara.
E ai ki te uri o Ngāti Hau, a Te Raa Nehua, “E ai ki a rātou kōrero, ehara i te mea me haere mai ki te tangata whenua kōrerohia ai ēnei kōrero mō te raihana nōreira ka nui te hē o ērā mahi. Horekau anō i maroke ai te hainatanga o te Tiriti, i timatahia e rātou te mahi hē.”
Hei tēnei marama tonu kōrero ai te karauna me te rōpu Tūhoronuku ki te rapu whakaaetanga mō tā rāua noho ki te tēpu whiriwhiri. He take tēnei kahore hoki e tautika ana ki te maha o ngā uri o ngā kaihaina i te Tiriti.
Hei tā Hone Harawira, “He aha te take ka hanga ai mātou i tērā kaupapa. He kaupapa nui, he kaupapa rangatira mā ngā rangatira o ngā hapū o Ngāpuhi katoa. Tērā te take e mea ana au kia Tūhoronuku, kaua koe e horo haere. Taihoa ake kia kotahi a Tūhoronuku me Te Kotahitanga, kia tae atu ki te tū kotahi mō mātou katoa.”
Ko te matenga o te reo Māori ki raro i ngā kaupapa o te iwi kueke, te hokinga mai o te ngāhere o Glenbervie kia Ngāti Hau me ngā hapū whai pānga, me te whai wāhi atu o tēnei iwi ki roto i te wāhanga pāmu wai ētahi o ngā takenui ki te rā tuatahi o tēnei nohonga.
Ki tā Nehua, “Ko mātou ngā mea e whai mana ai ki ēnā whenua, engari horekau e hiahia ana te haere mai ki te kōrero. Horekau anō i pono rātou ki tērā. Nōreira me whakapono rātou ki tēnā, tō tātou rangatiratanga.
Hei te Paraire o tēnei wiki hikina ai tēnei nohoanga.