Ko Te Pou o Mangatāwhiri, tētahi o ngā kapa i eke ki ngā whiringa toa o Te Matatini i te tau rua mano, tekau mā toru. Ko tā rātou hiahia, ko te tū rangatira, kaua i te ao kapahaka anahe, engari mā te awhi i te hunga kore kāinga i Kirikiriroa.
Koinei te kaupapa nui kua roa nei e haere i roto i te kapa, ā, koinei hoki tā rātou kaupapa e haria ana ki Ōtautahi.
E ai ki a Melaina Huaki, “I tīmata mai tēnei rōpū mai i Ngāruawāhia i te wā o Te Puea. I te tau 1921 i whakatūria tēnei rōpū ki te kohi pūtea mō tētahi hōhipera. Heoi nā runga i ngā ture o te kaunihera i tēra wā, ā, kāre rātou i whakaae kia whakatū tētahi hōhipera nōreira i tū te marae o Tūrangawaewae.”
Ki tā Tamiaho Heraengi Searancke, “Ko ngā mahi katoa o Te Pou o Mangatāwhiri kia hoki anō ki te marae. Ngā tikanga a marae, e tū tonu ana te whare tutaua o Pōtatau Te Wherowhero, te hāpai i ngā mahi te whakanui i tō tātou Kīngi.
Nōreira ia rā, ia rā, e parakatihi ana mātou ngā Uenuku kai Tangata ki ngā mahi mau rākau nei. Haunga hoki te hōhonutanga o ēnā mahi ko mātou ano tēnei o roto mai o te kapa e piu tonu ana i ngā rākau, ngā mahi mō te kapa nei. “
Hei tā Huaki, “I kite koe i ngā kitenga o Te Puea. He maha ngā kaupapa nō mātou. Ko te kaupapa o ngā Poukai mō te pani, mō te pouaru me te rawa kore. Koira tētahi whainga nunui mō mātou.
I haere mātou ki te whāngai kai mō te hunga rawa kore. I runga anō i ētahi ture i tini i te motu pērā i te Psycho Substance Act. I haere te nuinga o mātou ki te tautoko i tēra kaupapa. I tunu kai mātou, i hāere mātou ki te tāone ki te hāpai i te rōpū Hamilton Homeless Trust.”
E ai ki a Ngareta Takiari, “Atu i ngā kaupapa a iwi, he whānau, he hoa piri tata hoki i roto i te rōpū engari ko te mea nui he tūturu ki ngā kaupapa.”
Ki tā Hira Hona, “Ko te take e ngākaunuitia nei e au ki tēnei o taku rōpu, ko tōna kaupapa te mea nui ki ahau. Ko te tiaki, ko te manāki i te Kīngitanga. Ko ngā kaupapa o te Kīngitanga.
He rōpū tēnei mai ōku mātua, mai ōku tūpuna. Koira pea te take nui e ngākaunuitia ana e āhau ki tēnei o ngā kaupapa, ki tēnei o ngā rōpū a Te Pou o Mangatawhiri.
Hei tā Huaki, “Ka hoki ake ōku whakaaro mo te korero ko te Kīngitanga mō te ao katoa. Ko Tūngawaewae mō te āo katoa, ana koinei te āhua o tēnei rōpū.
Koinei ngā maramara o Tainui, koinei ngā whakatupuranga, ā, koinei ngā korero ā tō tātou kuia a Te Puea.”