E pāpōuri ana te perehetini o Te Pāti Māori a Naida Glavish ki ngā tao kupu e rere tonu ana ki a Te Ururoa Flavell i ngā kai-ārahi takirua ō-mua o te rōpu, i a Tariana Turia raua ko Pita Sharples.
Nā Sharples ngā anipā o te wa i whakapuaki, e whakahe nei i te whakatau a Te Ururoa Flavell kia whakatūria tētahi kōmiti arotake i te pire reo maori a Pita Sharples e raru nei.
E ai ki a Naida Glavish kei te epa kōhatu ngā kaiārahi-takirua o mua o te Pāti Māori ki a Te Ururoa Flavell, ā, te mōhio i a ia te take e pēnā ana.
Hei tā Naida Glavish horekau he rarurarutanga i waenga i te Pāti Māori. Heoi, e mōhiotia ana i te ao tōrangapū ko tā te tirohanga a te marea te tino, ā, e tutu ana te puehu.
He tirotiro haere ki ēnei whare hapori ta Naida Glavish i Kaitaia, heoi, ko ōna whakaaro i warea kē ki te whakatika i te whare o te Pāti Māori.
E ai ki a Nadia Glavish, “Ko taku e aroha atu ana ko ngā taimahatanga o ngā mahi i mahue ake e Tariana raua ko Pita ki runga ki ngā pokowhiwhi o Te Ururoa. Heoi anō, tā rātou i tōna tika aroha mai.”
E whakahē ana a Pita Sharples i ngā whakaritenga a Te Ururoa Flavell mō te kōmiti arotake i te pire reo Māori, te pire a Pita Sharples kua kaha whakahēngia e te tokomaha.
Āpiti atu, kua rere kā ngā tātā a Tariana Turia mo te whakatau i tautokona e Te Ururoa Flavell, kia riro mā Te Puni Kokiri ngā pūtea kainga Māori e titari.
Hei tā Glavish, “Nā rāua anō i whakaputa ki waho, kīhai i whakaputa ki waho kīhai i whakaputa ki waho ki te epaepa kōhatu ake ki a Te Ururoa kei roto e mahi ana i ngā mahi kīhai i oti i a raua.”
I kōrero a waea atu a Te Kāea ki a Pita Sharples i tēnei rā, karekau ia i wātea mō tētahi uiui, heoi, hei tana ehara tana whakahē i te take nui.
Kāti, karekau a Takuta Ranginui Walker i te whakaae atu ki tēnā. Hei tana, ko te Pāti Māori whānui ka rongo i te korohu o ngā arero wera o Pita Sharples rāua ko Tariana Turia.
Ki tā Ranginui Walker, “Mehemea e whakamana ana i a raua ki roto i te pāti me waiho a raua kōrero mā te kōmiti whakahaere mā te hui a tau e whiriwhiri.”
Kāti, ko te aki kia tukua ngā here.
E ai ki a Walker, “Kei waho ke raua i te pāremata inaianei, kaore he mana i ko atu i te mana kei runga i au me tēnā me tēnā o tātou.”
Hei tā Glavish, “Hoi anō taku e āhua pā pouri nei engari ko taku e tautoko atu i a Te Ururoa.”
He mahi nui tonu kei mua i te perehetini kia tū tika ai te whare o te Pāti Māori.