Kua ū te waka o te iwi o Ngāruahine ki uta i roto i āna mahi whakatau i āna kerēme tiriti o Waitangi.
Tuia atu ki te ono tekau mā whitu me te hāwhe miriona tāra, i tuku anō te Karauna i tāna whakapāha mō te mauheretanga o ngā tūpuna o Ngāruahine.
I ngā tau tahi mano waru rau e hia kē ngā tūpuna o Taranaki i tukua ki Hokitika i Te Waipounamu kia mauheretia ai.
Ko Tirohanga Moana ki Hokitika te wāhi i noho ngā tūpuna o Taranaki, o Ngāruahine i mauheretia e te Karauna he rua rau tau ki muri.
He poi, he pare kawakawa ngā taonga ki muri ake i āhau kua whakatakoro ki mua i te taonga whakamaumaha ki te tokorua rongonui o Taranaki a Tohu rāua ko Te Whiti.
Ko tēnei te wāhi i tuku ngā mihi whakapāha a te karauna ki te iwi o Ngāruahine.
He tahi rau toru tekau tau a Ngāruahine e tatari ana kia rongo i ēnei kupu.
E ai ki te Tiamana o Te Korowai o Ngāruahine, a Will Edward, “Te mamae, ko te tangi o te ngākau, ko te riri, ko te hoha, ko te nguha i puta. Nā, ko te hekeheke o te werawera i puta, ko te heke o te roimata me te hūpe. Mā ērā pea kua ea haere ki haere whakamua mātou.”
He whā rau mā rima ngā tāngata nō Taranaki i mauheretia kātahi ka tukuna atu ki Te Waipounamu i te tau tahi mano waru rau whitu tekau mā iwa. I tukuna te nuinga ki konei ki Hokitika.
Hei tā te Tiamana o Ngā Hapū o Ngāruahine Inc, a Omahuru Robinson, “He tino kaha o rātou mā ngā tūpuna, kei te tū pakari, kei te tū whawhai ki te Karauna ahakoa he patu, e mau ana i te raukura i roto i ngā āhuatanga o ngā tūpuna a Tohukakahi ano hoki, a Te Rongomai ki o mātou nei tūpuna tētahi tūpuna i roto i Ngāruahine ko Titokowaru tēnei. Koinei te huarahi e whai haere ana mātou ki te huarahi o rātou ngā tūpuna me ngā māngai i taua wā i mauheretia ki konei.”
He hokinga mahara te pao o ngā poi nei ki o rātou tūpuna.
Ki tā Robinson, “E toru ngā pao me ngā waiata tawhito, ko te tuatahi ko 'kī mai' pēnei i te karakia i runga i te waka o Aotea, anō hoki a 'pērā hoki' anō hoki a Paua. Koinei te tīmatanga o raupatu i muru, ka tīmata e mōhio ana koutou i te wāhi o Waitara i roto i te rohe nei o Taranaki nui tonu.”
Kua ea tā rātou haerenga ki Te Tai o Poutini, ināianei ka hoki atu a Ngāruahine ki te kainga ki te tīmata i ngā kōrero e pā ana ki te whakataunga kereme o Taranaki maunga.