Pārekareka ana ki ngā iwi Punjab o Tāmaki Makaurau te mātakitaki i te Kapa Kabaddi Wāhine o Aotearoa, e tukituki ana ki te kapa toa o te ao nō Īnia.
Kei Aotearoa nei te Kapa Wāhine o Inia mo ngā tukinga Kabaddi e rima, ki ngā wāhine Māori kua toru tau inaianei e tākaro ana i tēnei hākinakina no Punjab.
He otinga tuarua anō mō tō tātou Kapa Kabaddi Wāhine i ngā whakataetae Kabaddi Ipu o te Ao i tērā tau, ā ko ngā wāhine o Inia tonu kei te tihi o te maunga.
Nā te rikarika o te Kapa o Inia ki te tukituki anō ki ngā wāhine Māori nei te take kua tae mai rātou ki Aotearoa, me ngā tīma e rua, mō ngā kēmu whakataetae me ngā whakamātautau e rima.
I tū ētahi kēmu ki Takānini i ēnei rā whakatā me te wawata a ngā Kapa me ngā kaimātakitaki, kia tipu te tākaro nei ki Aotearoa.
E ai ki a Cynthia Strickland nō Aotearoa Wāhine Kabaddi, “Ahakoa te kaha o Tāwhirimātea, kua tae mai te maha o ngā tāngata ki te tipu ake te kēmu nei, kua tae mai ngā kōtiro i raro i te kaha, ae te kaha o te whakateatae nei.”
Hei tā Riripeti Motu nō Aotearoa Wāhine Kabaddi, “Ko te wawata mō te tīma nei mō Aotearoa hei tipu ake i roto i ngā iwi katoa.”
Nā reira, mārama ana te kite atu i ngā pukenga o ngāi Māori e piataata mai ana i roto i tēnei tākaro tukituki, ruturutu, tata mekemeke tonu atu, ā, e rapu kaitākaro tonu ana te Kapa o Aotearoa ehara mō Māori anake tēnei wero.
Ki tā Riripeti Motu nō Aotearoa Wāhine Kabaddi, “Karawhiua he kōrero, he īmera rānei ki tō tātou ipurangi, ki Facebook, NZ Women's Kabaddi Federation, kei reira tukua he karere kei whea ngā wānanga ngā parakitihi, haramai patua te whakamā, tēnā rā tātou.”
Ko ngā kaute whakamātautau i tenei wā e rua kia Inia, he kore kia Aotearoa, ko te whakamatautau tuatoru ka tu ki te Temepara Sikh ki Takanini a muri mai o te Aranga.