Ka whakaae a Tūhoe kia whakakotahi te Hui Ahurei a Tūhoe me te whakataetae kapa haka o Mataatua hei te wā o te aranga ki Ruatoki a tērā tau. He mea ohorere ki ētahi engari hei tā ngā heamana o ngā kōmiti whakahaere, kāre te ahureinga o aua kaupapa e rua e whakararua.
Kua āmine atu te heamana o te Kōmiti mō te Hui Ahurei o Tūhoe, a Te Manatū Ahurea, a Pou Temara, kia kotahi ai tō rātou hui ahurei me te whakataetae kapa haka ā-rohe o Mataatua hei tērā tau.
Hei tā Pou Temara, "He uaua te kimi moni mō ngā kaupapa e rua, he uaua ki te kimi moni mō Tūhoe, he uaua atu te kimi moni mō ngā whakataetae o Tūhoe, nō reira koirā te whāinga tino nui."
I te Rātapu ka hui tahi ngā mema o te Kōmiti o Mataatua me te Kōmiri o Te Manatū Ahurea ki te āta wānanga i te tono nei.
E ai ki a Temara, "Ka kimi a Tūhoe i tētahi huarahi e taea ai e rātou te kawe i ngā mea e rua."
Ko te tikanga mai rāno, kia riro mā ngā rohe e whitu o Mataatua te mana whakahaere ki te hautū i te whakataetae kapa haka ā-rohe o Mataatua. Hei tērā tau ka taka te mana me te nama ki a Tūhoe.
Hei tā Te Kaahautu Maxwell, "Ko wai a Mataatua ki te whakahē i te tono a Tūhoe i te mea kei runga i a Tūhoe tērā taumahatanga. Kei a rātou te mana whakahaere."
Ko te Hui Ahurei o Tūhoe tētahi o ngā huihuinga tuatahi ki te whakawā i ngā momo wāhanga o te haka i raro i ngā tikanga o Tūhoe, pēnei i te wero me te karanga.
Hei tā Temara, e kore rawa ngā wāhanga nei e waimemeha noa. "Ki ngā whakataetae o Mataatua mēnā rātou e hiahia ana ki te uru ki tērā whakataetae hoki, ko ngā kaiwhakawā ka hāngai noa ki ngā kaupapa e ono.
Hei te tuawaru o Oketopa ka hui ngā tarahiti e whitu o Te Manatū Ahurea ki te whiriwhiri i ngā heamana hōu mō taua rōpū me te whakatakoto me pēhea te whakatīnana i te kaupapa.