Kua whakakāhore tetahi rōpū nō Tūhoe i te whakatau kia whakakotahi ai te ahurei o Tūhoe me te Whakataetae Kapahaka ā-Rohe o Mataatua. Tekau ma toru ngā marae ka noho ki raro i te mana o tēnei rōpu.
Hei tā Te Komiti o Runga Chairman, Patrick McGarvey, “Ko te whakatau a ngā hapū o Ruatoki, kia wehe tonu ēnei hui engari kāre anō a Ruatoki kia whai reo ki roto i wēnei whakatau.”
Ka noho Te Komiti o Runga i raro i te mana o te Ropu Whakahaere i tohua i muri i te whakataunga kereeme o Tuhoe a Te Uru Taumata.
I te wiki ka huri i hui Te Manatu Ahurea, te komiti mana whakahaere i te hui ahurei a Tūhoe i reira hoki te heamana o te komiti whakahaere i te whakataetae kapa haka o Mātaatua i tērā hui i puta te tautoko kia tū ngātahi ngā hui e rua.
Engari ko ta tēnei hunga no Ruatoki me wānanga tonu te whakatau.
Hei tā McGarvey, “Ko te whakaaro pea i tēnei wā, ko te, kia kōrero tahi mātou me te rōpū ahurei, ā, ki te whiriwhiri hoki i ētahi huarahi e tutuki ai ngā kaupapa e rua, engari ko te tino āwangawanga a ngā hapū o Ruatoki, kāre i whai wāhi atu ki roto i ēnā kōrero.”
Neke atu i te wha tekau tau te pakeke o te hui ahurei a Tūhoe ka tū ia rua tau i ngā rangi whakatā o te aranga. Ko ta Tamiana Thrupp kaitautoko i te ahurei na ngā pākeke o Tūhoe i whakatū te ahurei kia kotahi te iwi.
Hei tā Tamiana Thrupp, “Ko te mahi kē, ko te honohono i a rātou i runga i o rātou whakapapa, i runga i a rātou whānau tonu, hapū, koira te tikanga o te kore tuku ki te hono nei na, me wehe anō te taha ki a Mātaatua.”
Mai konei kei te hiahia te komiti o Runga kia hui tahi i te taha o Te Manatu Ahurea o te hui ahurei a Tūhoe kia kimi i tētahi huarahi whakamua whai muri i te whakatau.