Arā ētahi o te iwi o Ngāi Tūhoe e whai nei kia mana ake te rangatiratanga o tō rātou mita, mā te whakaheke i te pū ngū i te pū ng ina tuhia ai tō rātou reo. E ai ki te heamana o Te Uru Taumatua, ki a Tamati Kruger mēna ko tō reo, tō tuakiritanga, mā tō reo e tau ai ko wai koe, nō hea koe.
Kua whakakorea te pū 'ng' ki roto i tēnei tuhinga a Te Kawa o Te Urewera, na Te Uru Taumatua i tuhi. E ai ki te rangatira o Tuhoe a Tamati Kruger kāre he 'g' i te kupu 'ng'
E ai ki te kaiwhataunga Tiriti o Te Uru Taumatua a Tamati Kruger, “Ki tōku mōhio na, Koira te reo o Hinepūkohungi me Te Maunga, kāre he 'g'.”
Ko te whakakore atu i te pū 'ng' te kaupapa matua o te rangahau a Te Mana Motuhake o Te Reo. Na Waitangi Teepa taua rangahau e kōkiri mo tana tohu paerua.
Hei tā Teepa, “Ko te painga o tēnei kaupapa me ngā ahuatanga kei te whakaputa mai e ngā whakatipuranga o Tūhoe, kei te kōrero mātou, kei te kōrero mātou mo to mātou reo, mo te ahunga o to mātou reo haere ake nei, ā, me ngā ahuatanga ka puta mai i a mātou ake.”
Ko Ngāi Tūhoe te iwi tuawhitu nunui o te motu, tokomaha hoki a rātou uri e mōhio ana ki te kōrero māori. I te tau rua mano mā ono, e toru tekau mā iwa ōrau te nui o ngā mema o te iwi mōhio ki te kōrero māori. Ko te whainga matua hei tā Kruger kia hiki ake te hunga kōrero māori.
Hei tā Kruger, “Ko te kaupapa nui kē, ki te toko ake i te reo. Koira kē te pakanga, koira kē te whawhai, koira kē tā tātau whai kia kore e ngaro te reo.”
E ai ki a Kruger ka taea e te whakakorenga o te pū 'ng' te whakaora i te reo o Tūhoe mo ake tonu atu.