He mātanga reo a Paraone Gloyne kua whakaingoatia ki ngā whiringa whakamutunga o Te Waitī, arā te wāhanga mō te reo me ngā tikanga o Ngā Tohu Matariki. Koia te kai-tīmata i te kaupapa hāpai i te kōrerotia o te reo i te Marama o Mahuru. Hei tāna, kei te ngākau mahaki i tāna kōharinga ki te taha o ētahi o ōna kaiako.
Ehara hoki te reo Māori i te reo noaiho ki a Paraone Gloyne, engari he kai kē ao noa, pō noa
Hei tā Paraone Gloyne, Kaitono, Ngā Whetū o Matariki, "Kāre e tū atu kāre e tua mai. Katoa āku mahi e noho ana te reo hei mātāmua. He nui aku mahi i roto i te reo, ka mutu e aroha ana ahau ki te reo, anō nei ehara i te mahi."
Ko Paraone rātou ko ngā mātanga reo Māori, ko Ahorangi Rawinia Higgins, ko Ahorangi William Te Rangiua (Pou) Temara ngā kaitono mō te tohu Te Waitī mō te reo me ngā tikanga.
Hei tā Paraone Gloyne, Kaitono, Ngā Whetū o Matariki, "E noho whakaiti ana i runga anō hoki i taku mōhio ki ērā atu kua whakaingoatia, ko tōku tohunga tētehi ko Te Pou Temara me tērā atu o ōku hoa, a Tākuta Rawinia, he nui ā rāua mahi nō reira ahau nei e noho whakaiti ana."
Nā Paraone Gloyne te kaupapa Mahuru Māori i kōkiri e toru tau ki muri. Tuatahi mō te hunga matatau ki te reo i te Wānanga o Aotearoa. Ināianei, e whānui ana te kaupapa me te pātaritari i te katoa me ngā reanga reo Māori katoa.
Ko tā Gloyne, "Ko Mahuru Māori te tauira e taea ana e tātou. Mehemea e tahuri te katoa o ngāi tātou e mōhio ana ki te kōrero Māori ki te kōrero Māori, ka tino ora te reo Māori."
E rua tekau mā rima tau neke atu a Gloyne e whai ana i te reo Māori. He kaiwhakaturuki ia mō te Amorangi o Te Panekiretanga me te Poutikanga, te Pou reo Matua me te kaihanga rautaki reo i Te Wānanga o Aotearoa.
Hei tā Gloyne, "Ko tōku tino tumanako kia kōrero Māori i te katoa o Aotearoa. Nō tātou tēnei reo. E kore pea i tōku oranga, i ōku rā, engari mā te aha i taku tō ngakingaki ki te whakaora i te reo, ki te whakatō i te reo ki roto i te hunga kāore anō kia tahuri mai, ko te whakapakari i te reo i roto i te hunga kua tīmata ki te kōrero Māori."
Ka tū Ngā Whetu o Matariki rua mano tekau mā whitu hei te rua tekau mā tahi o Hurae ki Tāmaki Paenga Hira.