Nō te putanga o te rīpoata tuku mana whakahaere o Ngāpuhi i te tau rua mano ngahuru mā rima, kua whai a Tūhoronuku i te mana kōkiri mō te whakataunga tiriti. Nō nā tata nei mahue ai te wā ki ngā uri o Ngāpuhi ki te whakahē i a rātou.
He hui e whakakotahi ana i ngā uri o Ngāpuhi i roto i ngā take whakataunga tiriti o tō rātou iwi.
Ko tā te kaiwhakahaere takirua o Te Kotahitanga, ko tā Pita Tipene, "E whakatōpū ana mātou i o mātou whakaaro mō te pae tawhiti. E anga atu ana a Ngāpuhi ki hea, ā, ko tētahi atu kaupapa he hohou i te rongo."
E whai ana tēnei i te korenga o Te Kotahitanga e hui tahi ki a Tūhoronuku ki te whakawāwā i ngā tohe o roto.
Ko tā Patu Hohepa o Te Kotahitanga o Ngā Hapū o Ngāpuhi, "Ko ngā mea āhua kino nei kei te haere tonu, parea ki te taha. Ko ngā hunga kei te hē me timata rātou ki te korero tahi ki te whakaaro me pēhea e tika ai ngā hē me pēhea e kotahi ai a Ngāpuhi."
Ko te Rāmere ka hori ake nei te rangi whakamutunga mā ngā uri o Ngāpuhi kia tautoko, kia whakahē rānei i a Tūhoronuku.
Ko tā Huhana Lyndon nō Ngāpuhi, "Ki te whakawhitiwhiti kōrero ki te wānanga hoki hei painga mō te iwi o Ngāpuhi. Nā reira ki au he wānanga pai tēnei ki te kōrero kia anga mua ai tō tātou titiro.
Ko tā te heamana o Tūhoronuku, ko tā Hone Sadler, ko te whakatau o te nuinga kia mahia te mahi.
E ai ki a Tipene, "Ka marama te kite i te huarahi mō ngā moemoea o ngā tini hapū. I te mutunga kia kūiti ai tēnā takoto kia whai atu te katoa o ngā hapū o Ngāpuhi i runga anō i te whakaaro kotahi."
E matapaetia ana ka tīmata ngā whakawhitinga kōrero a Tūhoronuku ki te kāwanatanga whai muri ake i ngā Kōwhiringa Pōti.