He taukumekume kua pupū ake i te whakakorenga ake o ngā pōti o te tāngata i tōna matenga. E whai ana tēnei i te rirohanga atu o tētahi kaipōti rangatahi i tuku pōti mōata, kāore ōna pōti ka whai wāhi i roto i ēnei kōwhiringa.
He māreikura kaupapa rangatahi o mua a Mehara Tamaki mo Te Tai Tokerau, he kaihāpai ā-motu hoki mo te rōpu Mana.
Nō tērā wiki tēnei uri o Ngāpuhi i hinga, i muri tata iho i tōna pōtitanga tuatahi, he whakatūtūranga whakamutunga mōna.
Ko tā te kaiārahi o Mana, ko tā Hone Harawira, "He wahine tautoko kaha i te whakaaro kia puta te reo o te rangatahi ki roto i nga wahanga o te kaunihera runanga a iwi rōpū tōrangapū he wahine tū kaha ki roto i a mātou o te rōpū Mana."
Engari, e ai ki te Kōmihana Take Kōwhiri, mēnā ka mate te kaituku pōti i mua i te rā pōti, ka kōpaetia i te kaute whakamutunga, ā, ka noho te mana whakatau ture ki rō Pāremata.
"Ko tētahi o ōna tino whainga i te wā tamariki ana i te mea 19 ōna tau i te wa i mate, ko tēnei te wa tuatahi kia tuku poti."
Nā tēnei āhua kua hua ake he petihana e tautokotia ana e te kotahi mano tāngata kia panonitia te ture take kōwhiri.
"Tērā te take e haere ana mātou ki te kōrero ki te komihana, ānei ona hoa, ānei ngā rangatahi e whai nei e te komihana kia tautoko i te kaupapa o te pōtī, me whakarangatira i te hiahia o te wahine nei."
Ko tā Harawira, kia mātaitia tēnei kaupapa ki te arotakenga kaupapa kōwhiri o te kōmiti whiriwhiri ki Pāremata.