Ko te hiahia a ngā kaihautu o te tonamana Aotearoa Māori maita ā motu kia whakaara ake i to rātou hākinakina. Kei Rotorua te kaupapa i tēnei tau, ā, kua heke iho ngā kaitākaro nō ērā huinga, wha tekau mā whitu ngā tīma kua rēhita. I ngā tau he tōnamana i kitea te tini tāngata, inaianei kua memeha hāere.
Hei ko tā Harold Hunt, tētahi o ngā kaiwhakarite, “koinei te ahua huri noa i te motu, kāre ngā rangatahi i te hiahia ki te takaro, tērā pea he mangere, aua.” Ko te whāinga a nga kaiwhakahāere kia kimi huarahi hou, e rarata mai ai ngā rangatahi.
Ki tā Simon Barakat, kaitākaro maita “kei te hiahia mātou ki whakahiki i tēnei kaupapa ki waenga i te hunga rangatahi, he whakatāwewe i te karoti ki mua i a rātou me kī, kia hara mai ki te takaro, i te mutunga iho he whainga kei reira, e piki koe ki te taumata.” Ko te hiahia a Homai Uarata, kaitaunaki - kia kaha aro mai ngā iwi ki te tautoko i te kaupapa.
“Ma mātou anō hei whakarite, hei whakatika, ēhara ma te rōpū o Aotearoa, engari ma te iwi Māori anō hei whakatū he komiti, hei whakahaere i tēnei kaupapa ki raro i te tikanga Māori, ki te mana Māori.”
Heoi he kotahi tau kei mua i te aroaro a nga kaiwhakahaere hei whakararata i te hunga mo te tōnamana a tera tau ki Te Matau a Maui.