Hei tērā wiki mana ai te whakatau kia autaki atu i ngā mahi hautū waka ki runga o Maungakiekie, ki Tāmaki Makaurau.
Heoi, ka whakaaetia kia kuhu atu te hunga hauā, otirā te hunga tē taea te hīkoi, mā runga i ō rātau na waka, engari me whai rātau i tētahi nama muna e pai ai tā rātau koke ki te tihi.
I puta rā te whakatau nei i te tīmatanga o te marama o Poutūterangi ao ake i ngā mahi whakatikatika i te huarahi e ahu atu ana ki te taumata o te maunga. I ngā rā o mua, ko Mungakiekie tētahi o ngā pā tūwatawata kaitā rawa o te rohe, ā, i ēnei rangi e kitea tonutia ana ngā parehua kei ōna tahataha.