Ko te kaiwhakāri rongonui ko Te Kohe Tuhaka te kiri pūaki matua i roto i te whakāri hōu nā te Whare Tapere o Tāmaki e kīa nei 'The Cherry Orchard'. Ko Colin McColl te kaitohutohu o te whakāri nei ā e rongonui ana ia mo te whakaauaha i ngā pūrākau ōkawa.
Kua pūkekotia e Te Kohe Tuhaka i roto i ngā mahi whakāri. He ika ā whiro tēnei uri o Ngāti Porou ā ko ia te whetu maiangi o te whakāri hōu The Cherry Orchard.
Ko tā Tuhaka, "Ko te kiri pūaki e whakatūria nei e au i roto i tēnei o ngā whakāri, ko tōna ingoa ko Wiremu Heretaunga. Ka tīmata ia ko tōna whakapapa nei i raro i tōna pāpā me tōna koroua e mahimahi he tu momo, he pāmu hipi he pāmu whakatipu tiere tēnei."
Hēoi ehara ko tāna te reo Māori anake ki runga i te atāmira.
Ko tā tēnei kaiwhakāri rongonui a Rawiri Paratene, "Ko te huringa mai o te wā, ko te maumaharatanga ā he aha rā i pupuri i warewaretia hoki. I tākea mai te whakāri nei i tētahi o ngā tohunga kaituhituhi ā Anton Chekov."
Ko tā tēnei uri Māori a Maria Walker, "Nā runga i ngā take o te wā, ka reira ngā take whenua, whakatu whare hoki. ko te mea e tōiriiri ana ki ahau ko te whakaeotanga."
Ko tā te kōrero a te kaitohutohu a Colin McColl, he titiro whakamuri ki ngā tau whitu tekau, te wā i whakarauora i te ahurea Māori.
Anei tā McColl mō te whakatenatena i te marea kia mātakitaki mai i te whakāri nei, "Me hara mai te marea ki te mātakitaki i te mea ko tō tātou hītori tēnei, i tū ēnei kaupapa katoa ki Aotearoa nei in roto i ngā tau whitu tekau i te wā i whakarauorahia i ngā take Māori me ngā hīkoi mo ngā take whenua, ā ki Takaparawha."
Ka whakapuare mai mā te matawhānui hei te tekau mā rua ki te rua tekau mē ono o tēnei marama ki te whare tapere o ASB Waterfront.