Ehara i te mea i riro noa iho te kapa o Te Waka Huia i te te tūranga tuatahi mo te reo Māori, engari kē rātou i mau i te taumata toa whakaihuwaka i te rohe o Tāmaki Makaurau.
E ai ki te kaitātaki tāne, ki a Hare Rua, mā te whakaharatau, kounga ai te ao haka.
"Mīharo tērā. Ka mihi, ka mīharo, ka mene mai tō mātou Pāpā me tō mātou māmā a Pimia."
Kāore te hunga mātakitaki i ohorere ki tēnei ekenga o rātou:
"Te waiata. Kāore kau he tīma kē atu i te reo o Te Waka Huia."
"Te Waka Huia, all time fav."
Heoi, i ūhia te kaupapa i te kapua pouri i te matenga o te pou haka, o Talei Morrisson.
"E rere ana ngā whakaaro ki tērā o ngā tuahine a Talei, nā reira e arohanui ana matou katoa mōna. He māreikura o te ao kapa haka."
I whakatūria te kapa e Tākuta Ngapo Wehi rāua ko tōna hoa rangatira, a Pimia wehi i te tau kotahi mano iwa rau waru tekau mā tahi. Ko tā te kaitātaki tāne, tā Hare Rua, kia tika te wānanga, ka tika te tū.
"Ka haere ana mātou ki ngā wānanga ka tino whakapau kaha i runga i te mōhio ki te kore e tika, ka hinga."
Anō i a Rua, ahakoa e rangatahi haere ana te hunga kaihaka, e whanake tonu ana te kounga o te haka ki tēnei rohe. Ko rātou ka whakakanohi i a Tāmaki Makaurau ki Te Matatini hei tērā Hui-tānguru.