E taunaki ana a Tākuta Lance O'Sullivan mo ngā kura tutōhinga, ko tāna he hurahi whai hua ma ngā tauira e kore e eke ki ngā taumata. Kei te whakahau ia i te motu kia tiro anō ki ēnei momo kura ā koinei pea te haurahi mo ngā whenua o Hato Pētera.
Ko te whakapono a O'Sullivan ka rīwhi tēnei momo kura i a Hato Pētara.
Ko tā tētahi o ngā tauira o te kura hōia o Vanguard a Parris Bryant, "I whakapakari tinana au ia te ata o te wiki, ka oho ake au i te haurua mai te rima karaka o te ata ka tae atu au ki te kura i te whitu karaka ā ka kaha whakapakari tinana au ki te whareoranga, ka tākaro poitukohu ki tāku e pai ai."
Ko te whakapono hoki a O'Sullivan he karere nui tō ēnei taiohi o Te Kura Hōia o Vanguard mo te kāwanatanga e pā ana ki ngā kura tutōhinga.
Ko tā tētahi atu o ngā tauira o te kura hōia o Vanguard a Josephine Newton, "Kei konei koe i te mea he hiahiatnga nōu kia tae mai koe ki konei, mēnā he hiahiatanga nōu kia kuraina ki konei me ngana koe i te mea e kore ngā hua o te ao ka hoatu mo te kore noa iho, me puku mahi koe mo tāu e hiahia nei."
Ko tā te kōrero a O'Sullivan, "He mea e arai atu ana i te punaha matauranga kia ako i ngā akoranga o tēnei momo me te tāpiri ēnei akoranga ki wāhi kē i ngā kura auraki punaha auraki hoki kia whiwhi ai ngā hua ehara ma te Māori anake ka kuraina ki ngā kura tutōhinga."
I tuku reta a Ta Toby Curtis ki te kāwanatanga kia ora tonu ngā kura tutōhinga ā kua hono ia ki te kaiarahi i te rōpu Moko Foundation.
Ko tā Curtis kōrero, "E mōhio whanuitia e tātou e paku rerekē ana ngā whakahaeretanga mo ngā kura tutōhinga atu i ngā kura auraki nei, ko tōna rerekētanga e kīa nei he huarahi anō tō ēnei kura te whai ake me te whakawhānui atu ki tua atu i te marautanga ka akona e ngā tauira ki roto i ngā kura auraki."
Ka whakakopani a O'Sullivan me tēnei kōrero, "Ko te manako nui ōku o ēnei karere nui katahi, ka wero atu ki ngā kaitōrangapu, arā ko ngā kaitōrangapu Māori kia huri ā rātou whakāro kia kaua e aukatihia i ngā kura tutōhinga i te motu."
Ko tā O'Sullivan e haere tonu ngā matapaki mo te ahu pēhea te papa whenua o Hato Pētara.