E ai ki a Tatauranga Aotearoa kua piki te tokomaha o te iwi nō Tokelau e noho ana ki Aotearoa. Nō te tau tekau mā toru whitu mano, rua rau rātou e noho ana ki konei, i tēnei wiki e whakanui ana to rātou reo. Ki tō Rob Lui Tuilave, māngai mo tōna hapori he wiki nui tēnei e whakamana ana i tōna hapori. Ko te whakara ake i te reo Tokelau te tuapapa mo tēnei wiki Hei tō Rob Lui Tuilave “he tokoiti te hunga nō Tokelau ki roto i taku taone noho na whai anō e akiaki ana ahau i taku reo ki aku tamariki, ahakoa te uaua, miharo katoa au ki taku reo”. E whakanui ana a Rob Tuilave i te wiki mo tōna reo ki te taiopenga mo ngā iwi o Te Moana nui a Kiwa ki Tauranga, hei tāna me mau ki te reo i te mea ko tōna ahurea kei roto. “I whānau mai ahau ki Aotearoa, i whānau mai hoki aku tamariki, nō reira na aku mātua i ako i ahau ko tāku kia whāngai ki aku tamariki”. Koinei te reo whakamutunga o ngā reo tokowhitu nō Te Moana nui a Kiwa kua whakanuia i tēnei wiki. Kei raro a Tokelau i ngā manaakitanga o Aotearoa, i ngā tatauranga o ngā iwi mai te moana nui a Kiwa e noho ana ki Aotearoa, ko te iwi Tokelau kei te rua iwa wha paihēneti o tērā tatau. “Ahakoa te paku o te wāhi ko te mataku i roto i ngā whakareanga e haere ake nei ka ngaro te moutere, na whai anō e kaha ana ngā hapori huri i a Aotearoa, Awakairangi, Rotorua, Porirua, Tamaki Makaurau me Taupō ki te hiki ake i te iwi Tokelau”. Ka mutu te wiki whakanui i te reo o Tokelau hei tēnei Rāhoroi.
National | Pacific
