E kotahi rau, rima tekau ngā tūranga mahi hou ka tū ki raro i tētahi kaupapa ahumahi ki Kawerau. Ka tuku ngā pūtea kāwanatanga whakawhanake a rohe, e rua miriona te nui ki taua kaupapa. Kei te patua te ahumahi ngahere e te kore mahi engari ma te kaupapa hou, ka whai hua a Kawerau. Hei tō Shane Jones te Minita Whanake Ōhanga ā rohe “kia rite ai tēnei papa hei kaupapa whakatū pakihi, hei kaupapa whakatū umanga he rua miriona tāra, otira, ko te takahanga tuatahi tēnei”. Koinei ngā whenua Māori o raro iho i te pōari Kaitiaki o Pūtauaki, hei tōna wā ka noho tēnei whenua hei pokapū ahumahi. Hei tō te heamana o te pōari kaitiaki o Pūtauaki a Kirwaitingi Rei “ko tēnei whenua, he whenua i ahu mai i a Te Pahipoto, ngā uri o Te Rangitūkehu, nō roto o Ngāti Awa, ana, nō mātou kē tēnei whenua, ana, kua roa rawa mātou e takahia nei i tēnei huarahi”. Mo Michael Barnett, Heamana, Toi EDA tētahi o ngā rōpū i hāngai i tēnei kaupapa “ko tētahi wāhanga o tēnei kaupapa kia whakatū i tētahi pokapū hei wāhi ahumahi ma te tangata, kia whai wāhi rātou ki te whakatū i o rātou pakihi, kia whakatū i tētahi hapori, ma te pakihi ka hara mai te tangata, te hapori”. Ka haere ngā pūtea ki ngā mahi hanganga etahi huarahi hou me ngā ara tereina. Ka tū hoki tētahi waahi tūnga pouaka. “Kia whai mahi ngā uri whakatipu, otira e noho pohara ana ki Kawerau, otira i te moana nui a Toi ana kua roa ana mātou e mahi ana i te taha o te kauniehra o konei” ki tō Rei. E kotahi rau heketea ngā whenua Māori ki raro i te pōari kaitiaki o Pūtauaki ka whakawātea mo te whakatūhanga o tēnei tauranga paepae.
National | Industry New Zealand