Ko ngā whakahōutanga ki Te Poho o Hine i Tuhia, te wharekai i Te Poho o Rāwiri Marae ki Tūranga, e tō ana i te whare tawhito rā, e waru tekau mā waru tau te pakeke, ki te ao hōu. Hei tā Charlotte Gibson, te hea o te marae, mā ngā whakahōutanga e whakatū huarahi ki mua.
“Torutoru noa iho e mau ana i te mauri o te paepae, manaaki i te tangata o roto i te whare me wērā momo mahi, horoi i ngā paepae hamuti, koira te īnoi kia hoki mai ōna uri ki tōna whare”, te kī a Charlotte Gibson.
He paepae hamuti hou, he wharekai hou anō hoki e manaakitia ai te mano tāngata.
“Bells and whistles, pai ki waku cousins, nō te mea he tangata marae mātau katoa, tipu mai mātau i runga i te marae, ā, mai i tērā tipuranga, ā, tae noa atu ki te matetanga a te tangata i mahi mātau i te marae”, tā Charlotte Gibson.
Hei tā Temepara Isaacs, “Kei te mīharo ngā whakaaro, kua roa mātau e tatari ana tēnei āhuatanga ināianei kua taonga ināianei kei te whakahariru mātau”.
At the opening of Te Poho a Hine i Tuhia in Turanganui a Kiwa, manuhiri and iwi kaenga are welcomed into the new wharekai with anthems from Te Tairawhiti.
Posted by Te Ao Māori News on Thursday, December 27, 2018
He kaiwero, he ringawera anō hoki a Tamati Tangohau Gibson, “He roa nei te wā kua tatari mātau ngā uri toto whakaheke o tēnei marae, otirā kua oho tō mātau tipua, tō mātau wahine rangatira a Hine i Tuhia o Te Rangi.
He toru ira whā miriona tāra te nama o Te Pā Eke Tū, arā, ko te tau tuatoru tēnei e whakahou ana i ngā whare o te marae.
Hei tā Charlotte Gibson, “Mehemea ka hanga he whare hou ko te tikanga me whakakī i te whare i te tangata ahakoa tana ataahua, ahakoa te nui o te pūtea, kāre tērā i te tino kaupapa, ko te kaupapa nui me whakakao nei i ngā tāngata katoa, koira te mea nui”.
Kei te tāepaepatanga o te rangi te aro a te reanga hou.
Hei tā Tamati Tangohau Gibson, “Ko te haria mai i ngā pōti ki runga i te maunga, ki reira kōrero tahi ki a rātau, haria mai ki konei ki te pā, kia pōhiri ai i a rātau me ngā mahi kapa haka anō hoki, nā reira koira kei tua”.
Hei te tau e heke mai nei whakatūwheratia anō te whare tipuna o Te Poho o Rawiri Marae.