He kūia nō Ngāti Porou, ko Hinetu Dell te kanohi o te whakatairanga hou a Tapoi Aotearoa e kīa nei ko 100% Pure Welcome. Ko tētahi peka o te whakatairanga, he kaupoi taiohi nō Tokomaru, ā, e urutā ana i ngā pae pāpāho pāpori.
Tērā te haeata ka tākiri iho ki runga o Hikurangi, arā ko Ngāti Porou tērā e tū ana hei kanohi mō Aotearoa, e pōwhiri atu ana ki te ao whānui.
“Ana I whai wā, i au i te tuku atu te reo Māori i roto i a rātau kōrero Pākehā koinā kē te mea mīharo. Nō muri kē mai ka kōrero mai rātau ki a au, ā, ka tuku atu te reo Māori me te reo Pākehā” te kī a Hinetu Dell.
I mahi ngātahi a Tāpoi Aotearoa, a Tāpoi Tairāwhti rātau ko Ngāti Porou kia hopu kōrero i Hikurangi. Ka mutu, neke atu i te rua rau, rima tekau mano ngā wā kua mātakiahia te kiriata whakatairanga nei ki Ūtupa.
“Waimarie au i tēnā tū āhuatanga nā te mea he wahine tauhou au i roto i tēnā ao, ana ko tōku wairua tonu e pā ana ki roto i ngā mahi Māori, i roto i tērā wā paku i tutuki te reo i roto i tō rātau tukutanga", te kī a Hinetu Dell.
I te maru o te kaupapa whakatairanga hou nei Tāpoi Aotearoa, he kiriata hou ka whakairia ake ia rā, e whakaatu ana i ngā kainoho o Niu Tireni e 'ata mārie' ana i ngā wāhi pai rawa atu ki a rātau. Hei tā Hinetu Dell o Ngāti Porou he tauira pai mō ngā taiohi e toro atu ana ki ngā hanga matihiko.
“Ko te whakaaro tērā pea ko ngā rangatahi ka kite ka hiahia ki te kawe i tēnā kaupapa, ka taea rātau te pātai tonu mai ki a au nā te mea kei te kāenga nei au ehara i te mea me haere rānei ki Hollywood kei konei tonu tērā tū āhuatanga ka taea e rātau te kawe.”
Kei te ākina ngā tāngata o Niu Tireni kia whai wāhi atu ki te hanga i wā rātau ake kiriata 'ata mārie', kia tohatoha atu ki ngā pae pāpori me te tohu marau #atamārieaoniutireni.
Hei tā Hinetu Dell, “Kia kaha ki te kawe i ngā taonga a o tātau mātua tīpuna, kei reira te oranga.”
Tērā pea, ā tōna wā puta ai tētahi whakatairanga tāpoi he kotahi ōrau reo Māori?
Kārekau he kirimana i waenganui i a Tāpoi Aotearoa me Tāpoi Ngāti Porou.