Te waitohu a Pare Hauraki i Pāremata / Pūtake - Kōnae
Ko te whakatau a Te Taraipiunara o Waitangi, i mahue i te Karauna āna herenga kia kahurangi te tū. E karanga ana ia ki te Karauna kia whakatārewahia tāna whakataunga me Pare Hauraki, kia tika rā anō ai āna whakaritenga.
I roto i āna tūtohutanga, ko tāna e mea ana, “Ko te pire ka whakamana i te Whakataunga a Te Kohinga o Pare Hauraki, i te kawenata whakataunga a te iwi o Hauraki anō hoki, ka kore e koke whakamua, kia tau rā anō ngā take mautohe ki tētahi tukanga e tika ana mō ngā kerēme whakawhiti."
Heoi i puta i a Pare Hauraki he pānui e mea ana, “Kīhai te Taraipiunara i kī atu, nō Ngāi Te Rangi, Ngāti Ranginui me Ngāti Wai te mana whenua motuhake ake ki ngā wāhi e tohengia ana, e ai ki ā rātou tohe."
Ko tā Pare Hauraki whakamāramatanga mō te pūrongo, ko ēnei iwi katoa, rātou ko Pare Hauraki, kei te whai pānga ki Tauranga Moana.
“Kīhai te Taraipiunara i mea ake, kaare he pānga tuku iho o Pare Hauraki ki ngā wāhi mautohe e tohengia ana e Ngāi Te Rangi, e Ngāti Ranginui me Ngāti Wai. Ehara tēnei i te ohorere.
“Hei tauira, nā te Taraipiunara te kitenga i ngā pūrongo i mua ake, ko Pare Hauraki, ka whai pānga, otirā, he pānga mauroa ki roto o Tauranga Moana."
Ko te rerekētanga o tēnei kaupapa, ko te whai wāhi o te noho kanohi-ki-te-kanohi me ngā momo rōpū, i raro i tētahi tukanga whai tikanga.
“He tukanga whakamana i te iwi ki te whakatau take ki waenga i a rātou, ki te whakatinana hoki i tō rātou tino rangatiratanga, ehara mā te whakataunga a te Minita,” te kī a te pūrongo.
Heoi, arā ngā whakatūpato a te Taraipiunara ki a rātou ka whai i tēnei ara:
“…rātou ka whai kia kuhu ki te tukanga tikanga, me tika hoki tā rātou tū. Me aro ki te tukanga i runga i te hiahia kia pono te whakatika take, i raro i ngā tikanga.
"Kaare e taea e te rōpū whakahē te whai i tēnei momo tukanga hei ara whakatōroa, whakapōrearea rānei i tētahi whakataunga tē whakaaetia e rātou.
"Tērā momo aronga, ehara i te tika, ā ka whai mana te Karauna ki te whakahē i aua momo mahi."
Hei tā Ngarimu Blair, heamana tuarua o Ngāti Whātua Ōrākei, e whakaū ana te pūrongo i ngā kōrero kua hia nei ngā tau e kīa ana e Ngāti Whātua Ōrākei.
“We have developed our own tikanga-based solution for overlapping interests with Ngāti Paoa, and it is working. But the parties need to act honestly and with integrity, which has not happened with Marutūāhu.”