He tuakana-taina a Tioreore rāua ko Kararaina Ngātai Melbourne o Ngāti Porou me Tūhoe, kua whai pūtea tautoko i te taiopenga kiriata o Māoriland hei whakatutuki i o rāua wawata hanga kiriata.
Nō Te Tairāwhiti te tokorua nei, arā i tipu iho i te maru o te Aho Matua i Te Kura Kaupapa Māori o Kawakawa Mai Tawhiti, ka mutu, e ngākaui nui ana rāua tahi ki tō rāua ao Māori.
Ko Tioreore Ngātai Melbourne tērā, e rua tekau mā tahi ōna tau, ā, he akonga kua eke nei ki te tau tuatoru i te kura o Toi Whakaari. He kaiwhakaari a Tioreore i te kiriata 'Hunt for The Wilderpeople' nā Taika Waititi, ka mutu, he kiripuaki matua i te kiriata 'Cousins' e kainamu mai nei, he mea tohutohu nā Ainsley Gardiner rāua Briar Grace-Smith hei whakakōrero i te pukapuka rā nā Patricia Grace.
E rima rau tāra te wāiru o te pūtea tautoko nei kua riro i a Tioreore, arā ko te aronga o tāna kiriata he wetewete i te tāmitanga me te mamae tuku iho, mā roto tonu i te tirohanga a ngā tamariki e rua.
Ko tā Tīoreore ko te ngako ia o tāna nei kiriata, “He kākahu i ngā pūrakau whakaheke a kui, a koro mā.”
E pā ana ki tana riro i te pūtea taunaki nei, ko tā Tīoreore, “Kei te whai au i te mea e tino whakapono ana ahau ki ngā kai hāpai o tēnei kamupene whakaora i te reo Māori ki roto i ngā mahi Toi Rēhia.”
Kāti ko Kararaina Ngatai Melbourne te taina e tekau mā iwa ōna tau, ā, kua whiwhi i a ia i tētahi Tono Rangatahi i a Māoriland. Ko tāna e whao nei, he whakaaturanga ō nāianei e tiro atu ana ki te whanaungatanga i weanganui i tētahi taitama tāne me tōna matua kēkē.
Hei tā Kararaina, “I kōwhiri au i tēnei kaupapa nā te mea tata tonu nei ki tōku manawa, ā, ko ngā take o te mate hinengaro.”
Kāre i ārikarika ngā mihi a ngā kaiwhakawā o Māoriland ki a Kararaina, “Ōkawa ake nei te tono a Kararaina, ka mutu, i eke ki tētahi taumata e whakamīharo atu ai te hunga pakeke. He mārama tana whakatakoto i te whakaaro, ā, i te mea ko te Tairāwhiti hei horopaki mō tana kiriata, kei reira te pitomata e eke ai āna mahi ki te toi o ngā rangi."
He pia a Kararaina o te rōpū Ngā Pakiaka i te maru o Māoriland, he kāhui rangatahi i waenga i te tekau mā rua me te rua tekau mā whā tau te pakeke e whakamanahia ana hei whakahaere i te taiopenga kiriata Māoriland.
“I ngā rā tata tonu nei i uru atu au ki te roopu Rangatahi a Māoriland e mōhio nei ko Ngā Pakiaka, ā, na tō rātou awhi, nā tō rātou poipoi i ahau kia whakawhanake i aku pūkenga hanga whakaari, ā, kua tipu tōku aroha mo tēnei momo mahi. E mihi nui ana kia rātou o Māoriland”, te kī a Kararaina.
E whakapono atu ana te tokorua nei ki te maha o ngā hua ā-ahurea, ā-whakaaro, ā-whanonga nei anō hoki e tarea ai te whakaputa i ngā kiritata ā te Māori.
“Ko tōku hiahia kia whakaawe i ōku tēina otirā ngā taiohi Māori katoa o te motu. Ko te ao kei te kapu o tō ringa", tā Kararaina.
Hei tā Tīoreore, “He hua nui tō te whai matauranga ki ngā āhuatanga o nehe, kei taka koe ki te hē, kei reira kē ngā kiriata hei ārahi ia koe.”
Kāre e kore ā tōna wā rangona whānuitia ai ngā ingoa e rua nei puta noa i te ao kiriata iwi taketake whānui i a rāua e tipu ana, e rea ana, e whanake ake ana i roto ngā mahi nei o te ao kiriata.
Ko tā Kararaina, "Ko te wawata nui mōku ake kia whai reo ngā take Māori, ngā take huhua e patu nei ia tātou."
Hei tā Tīoreore, "Ko taku wawata nui kia Māori mai te ao Kiriata."
He rima rau tāra ka whakawhiwhia ki te tokorua nei hei taunaki i wā rāua mahi i runga i tēnei huarahi auaha.