Kei te rongonui haere a Ihaka Whanarere-Tauri ki runga ipurangi mō te patu i te poi, ināianei kua whakawhiwhia ki a ia i te ingoa tuarua o Tama Poi.
Tekau mā rua noa ngā tau o te uri nei nō Te Ātihaunui-ā-Pāpārangi me Te Iwi Morehu, mai te wā e pēpi ana ia kua patupatu i te poi.
“Kaua e ware atu ki ngā kōrero o tangata kē atu, hoea tō waka, tū whakahī ia koe anō," hei tā Tama Poi.
Ko Tyson Tauri tōna pāpā i tapaina ia i te ingoa Tama Poi, hei whakakanohi i te wharangi pukamata.
E ai ki aia, he ingoa e whakamārama i ngā pukenga o tana tama.
“Ko te tino whāinga kia kite he aha te roanga mōku kia waihotia i ngā poi, kia whakamanawa i te mōtu ki te whakarauora i ngā tikanga me ngā kawa o te poi,” hei tā Tama Poi anō.
I te marama o Akuhata i tērā tau ka pōhia e ia i tētahi tiriata o tana patu i te poi ka rere whānui ki te ao, nā wai rā, ka timata tētahi whārangi puka mata e kī nei ko Tama Poi.
Kei tu atu i te 138 mano ngā tāngata kua mātakitaki i tētahi o āna tiriata poi ki runga i tana whārangi.
Ka whakahī katoa au i aia me ōna mahi “Tama Poi”, kua ngākaupai ngā whakahoki kōrero o te marea ki te whārangi pukamata, ēngari hoki ko tōna tino mate nui ki te whāngai i ōna pukenga ki te ao, hei Ahungarangi Whanarere te māmā o Tama Poi.
“Kua kite i te ngākau whiwhita o Ihaka me te mōhio e tamariki tōnu aia, i kite hoki i tōna kaha ki te Kapa Haka Ā-Rohe o Aotea waka 2021 ki Whanganui. Kua māhaki ake au i te wairua o tāku tama,” hei tā māmā anō.
He kaihaka a Ahungarangi mō Te Reanga Morehu o Ratana, kua tū anō ia mō te kapa haka o Te Matapihi, ko ia hoki te tauira me te take e patupatu ana a Ihaka i te poi.
Ka mutu hei tā Ihaka anō, kāore āno ia kia whakamātau ki ngā wero kino o āna mahi poi.
Haere ki te whārangi pukamata o Tama Poi kia kite mai ai koe i ngā tini poi kua tutuki kē ia Tama Poi.
