E whakawhānuitia ana te kura wānanga poipoi i ngā taiohi o Whanganui e kīa nei ko Te Rangataioho, i te rironga mā ngā whanaunga o Tahiti te kaupapa e pīkau.
"Kua puta te whakatau kia whakatū i tētahi kura mō ngā taiohi o tērā whenua," hei tā te Kaiwhakahaere Takirua o Te Rangataioho, tā Tākuta Petina Winiata.
"Nā Mama Melinda Bodni te whakatau, nāna hoki te karanga ki Te Rangataioho kia koke atu ki te whenua taurikura kia whakatūwhera i te kura, hei te tau 2023-2024," hei tāna.
![](https://whakaatamaori-teaomaori-prod.web.arc-cdn.net/resizer/v2/CXJTRPX3ETDOIJBCZZBPWETLHI.jpg?auth=bd0fe7c6525c135e2662d3ba0ed4139485bf67bc332e32e8492403f444ac382b&width=800&height=599)
I te kura wānanga tuatahi, i te marama o Āperira 2021, 17 ngā taiohi i uru atu ki te kaupapa ki te ako i tō rātou Whanganuitanga.
He tino moemoeā tēnei nā Rama Ashford kia tū rangatira ai, kia tū māia ai ko ngā rangatahi o te rohe ki roto i tō rātou tuakiritanga.
“I te tīmatanga o te kaupapa i kite kaha i te whakamā o te hunga taiohi, me te wehewehe ki waenganui i a rātou anō. I kite hoki i te whakamā ki te whakapuaki i tō rātou Whanganuitanga," te kōrero anō a Winiata.
"Kua tutuki katoa rātou i [sic] ngā wawata o Rama Ashford me tēnei kaupapa, waihoki, kua whakamanahia te mita o Whanganui," hei tāna.
![](https://whakaatamaori-teaomaori-prod.web.arc-cdn.net/resizer/v2/DENXOMGNLBZBQA3TBHT7GGCSOU.jpg?auth=73851d37f70e2cdde0c576edd1d259636a8303ce0c8ee2bd16fd6aea9c9d637f&width=800&height=360)
"Me kī ko te hunga taiohi nei te kanohi kitea o Te Whare Karioi, he wānanga, he hāngai pū ana ki ngā pūrākau e ai ki ngā uri o Whanganui."
Ā te wā e tuwhera ai ko te kura wānanga nei ki Tahiti e kīa nei ko Te Va'ataioho, ko te tūmanako ia ka tae ā-tinana atu ko te whānau tonu o Te Rangataioho nō Whanganui ki te whakanui i te kaupapa.
![](https://whakaatamaori-teaomaori-prod.web.arc-cdn.net/resizer/v2/JIL733XICYGC4RSHGDXKRXRROM.jpg?auth=4609980218e0f2fcb7ec2a73158418846759b927f5f44e8b31a5fe2356a88723&width=800&height=800)