Ko Eugene Temara o Ngāi Tūhoe, Tainui me Te Arawa te kaiwaiata, he ringa puoro hoki o Origin Roots Aotearoa (O.R.A) e pārekareka ana i te nui ngā wheako pai ka hua mai i ngā tini whakangahau o tēnei wā o te tau.
I tērā wiki i ngahau rātou i te konohete a 1814 ki Opononi, ā, ka pakaru mai te papa patooro. Nā tēnei kua ako a O.R.A ki te whakangahau tonu, kia waiho mā te anamata e whakatika ngā hē.
“Rawe tō mātau ā-wheako, waihoki he rawe ngā wero kua wero i te pēne, ki a au he akoranga e whakakotahi i te pēne hei whānau kotahi," hei tā Eugene.
Hei te marama e tū mai nei ka puta i a O.R.A tētahi waiata reo Māori e kīa nei ko ‘He reo ORA’.
“Ko te ngākau whiwhita ki ngā wāriu o te reo, ngā tikanga me ngā kawa e tēpara i au ki roto i ngā mahi o te ao puoro” hei tā Eugene āno.
“Ngāwari ake te tito waiata, ko te rikoata me ngā taonga puoro te wero o te pēne, engari ko te manako ia ka eke panuku te waiata reo Maōri."
He kaiako a Temara i te ao, ā, hei ngā pō ka puta rātou ko tana pēne ki te whakangahau me te whakakoakoa i te marea.
“I puoho taua te maha o ngā tangata i a au, mai i ngā kaiwaiata tae noa atu ki ngā tāngata i whakaako i a au ki ngā āhuatanga o te ao waiata, o te puoro,” hei tāna anō.
“Ki ngā kaupapa ā whānau, ka tū mātou te whānau Temara ki te whakangahau atu i ētahi waiata, me kī i ngā waiata lol. Kāore aku māharahara."
Ko O.R.A e whakapono ana, mā ngā waiata te marea e whakakipakipa kia whai i ō rātou moemoeā, kia whai i te tika me te pono.
