Kua roa rawa te wā kaore tētehi uri tāne o te whanau McLeod o Ngāti Tū hapū o Ngāruahinerangi iwi ki te tonga o Taranaki ka mau moko kanohi.
Hei tā Connor McLeod kua whitu whakatupuranga ināianei te moko e ngaro ana ki ngā mata o ōna tauheke. Nā reira ka toko ake te whakaaro ki roto i a ia ki te whakauru ki ngā tikanga o te mau mataora, ki tētehi wānanga ka tū ki tōna ake marae.
“Kua roa ana te wā kāore e tū ngā tane ora e mau mataora i roto i te whānau,” hei tā Connor.
Mā te mataora, ka whakakanohi ai e Connor i ngā kōrero tuku iho o ngā manu e rua ā Tohu Kakahi me Te Whiti o Rongomai. Ko Paraukau Tūkau te whare tūpuna e hono ai ngā uri o tēnei hapū ki tā rātou Parihakatanga.
“E kawea nei ērā momo āhuatanga o te manawanui, o te rangimarie me te arohanui ki ngā tangata katoa,” hei tā Connor anō.
Ehara i te mea kei te takahia e ia i te huarahi mokemoke, kei te whai kē ia i ngā mahi o tōna māmā, ko ia te tauira me te mea hoki ko ia te tuatahi i roto i te whānau nei ki te whiwhi ki tētehi moko kauae.
Ko te mātānga ringa toi a Rangi Kipa, e whakautu ana i te reo karanga o te moko papa, kia moko te whenua, kia moko te kanohi.
“Kei te kimi au i ngā oranga kei roto i tēnei o ngā taonga o ngā matua tipuna. kei te koa te tini, kei te koa te marae kia hoki mai anō te iwi ki tōna poho, he nui ngā koa kei roto i tēnā tūāhuatanga,” hei tā Rangi.
“I ahu mai i ngā tini kaitā e wawata tonutia kia puāwai tēnei tūāhuatanga kei waenga i ngā marae maha o te motu me kī. Kia kaua e herea ki tēnei momo toi ki ngā toa, kia whakahoki ki ngā marae ātea o tēnā marae, o tēnā marae, o tō tātou motu o Aotearoa nei,” hei tā Rangi anō.
Ko te iwi o Ngāruahinerangi e arataki i tā rātou kaupapa mokopapa tuatahi i runga ia Waiōkura pā. E ai ki a Bonita Bigham o Ngāruahinerangi kua roa te wā e tatari ana te hapū kia tū ai he kaupapa pēnei.
“I te wā i mahi au tētehi akoranga mo taku masters i whakaaro au mo taku haerenga ki te whai moko kauae, pera tōku tino akoranga i taua wā. I tū tētehi whakaaturanga ki konei ki Waiōkura ki roto i a Paraukau, he whakaaro me pēhea anō a tātou mahi ki konei nā te mea kāore anō ētehi o ngā whakaahua a ngā tangata mau moko ai,” hei tā Bonita.
“No reira i kōrero ki a te Aorangi, i kōrero ki a Rangi me pēhea tātou e tū he mokopapa ki kōnei mō te iwi ki te whakahokia tēnei taonga ki a tātou,” hei tā Bonita anō
Ko te hiahia o te iwi nei kia haere tonu ēnei āhuatanga o ngā mokopapa ki roto i te iwi o Ngāruahine, ā, ki roto ia Taranaki whānui.
