Tōna rua tekau ngā kaipatu ahi kei runga i Te Pane o Mataaho, i Ngā Hau Māngere, e tinei ana i te ahi i muramura ai i te taha uru o te maunga i tēnei rā.
Tokoono o rātou e mau ana i te ngongo e mapu wai atu ana ki te wāhi kua wera i te ahi, ko tōna rima tekau mita te whānui, ko tōna waru tekau mita hoki te whāroa.
He wāhanga o te huarahi o Wallace kua aukatia tonutia e ngā pirihimana, ā, e toru ngā waka patu ahi kei reira tonu.
I kitea te ahi e muramura mai ana i te takiwā o te haurua i te whā karaka i tēnei ahiahi. E meatia ana, e toru ngā tāne i mauherea e ngā pirihimana, i tētahi whare pātata atu ki te maunga, i Kapuka Rd. E ai ki ngā kōrero, nā ētahi o te iwi tūmatanui rātou i kite e hika ana i te ahi.
Ko Te Pane o Mataaho, he maunga tipua ki ngā iwi mana whenua o Te Ākitai, o Te Waiōhua, ā, kei raro te maunga i te mana whakahaere a Te Tūpuna Maunga Authority.