He haurua miriona ngā kaiwhaiwhai i ngā pae pāhopori, ko Paaka Davis e rongonui whānuitia ana i TikTok.
I tēnei marama, i toa i a ia te tohu ‘Pāpāho Arorangi Toa, i Ngā Tohu TikTok o Ahitereiria Aotearoa.
“Ko taku tūmanako, nā taku toa i tēnei tohu, ka whakaatu, ko tō tātou ātea hoki tēnei, ā ākene pea he maha ngā tāngata i waho rā kei te hiahia tautoko i ō tātou tāngata,” tā Davis kōrero.
E 38 tau te pakeke o tēnei uri o Te Rarawa, Ngāpuhi, Ngāti Porou, Rongowhakaata, Te Whānau a Kai, Ngāti Kahungunu ki Wairoa hoki, ā hei tāna, i eke ki TikTok i ngā tau e 3 ki muri nei, kia whai wāhi noa iho ia ki tētahi whakamātautau hei pānui i te mīhini whāngai kupu nā tētahi kaiwaihanga pāhotanga ki TikTok i whakaputa.
”I tino pīrangi au ki te whakamātautau atu, ā i taea mā TikTok anake.”
”Mea rawa ake, i puta ngā pātai a te hunga (ki a au) mō te ao Māori, mō te ao moko” hei tāna.
Te whakaohoho i te iwi Māori
I ia rā, i ia rā ka whakapāho arorangi a Paaka ki ōna kaimātakitaki e 440,000, atu i tōna kāinga i Tāmaki Makaurau. Ko ētahi o āna pāhotanga e whakapūmau ana i te reo, ki te mātauranga Māori anō hoki. Engari, hei tāna, ka aro pū ia ki hāpai ake i ētahi atu kaiwaihanga pāhotanga Māori e whakamahi ana i te taupānga rā.
”Ehara au i te kaiako reo Māori, ā i te tahuri mai ētahi ki au ki te tuku pātai mai, nā reira i ēnei rā, ka tonohia atu rātou ka pātai mai mō te reo Māori, ki kaiwhakapāho kē atu e whai ana ki te hiki i wā rātou pae kōrero e hāngai ana ki tērā.”
Ehara ko ia anahe te Māori i whai tohu i te hui tuku tohu.
Ko Judah Metu-Teaukura te tuatahi i tohua ki te tohu kaiwaihanga pāhotanga toa o te tau 2023 ki Aotearoa.
Hei tā Paaka, kei te kōhungahunga tonu a TikTok hei taupānga, ā e whakapono ana, he waka anō ka whakakite i te ao Māori ki te ao.
”E tūmanako ana au, ka whakaihiihi ia i ētahi atu Māori ki te waihanga pāhotanga, ki te tuku hoki i ō rātou whakaaro mō te ao e noho ai rātou, mō ngā mahi e mahi ai rātou.”
