He kāhui o ngā rangatira ā iwi i tae atu ki te hui COP28 i Abu Dhabi ki te whakatakoto i te kaupapa Hinemoana Halo, e whai nei kia tiaki i ngā ararau a ngā tohorā i ngā moana o te ao.
“Kua whai wāhi pū mātou tahi ko ētahi kaiārahi o te ao ki te kōrero i ngā take matua ki a mātou,” te kī a Aperahama Edwards, kaiwhakahaere takirua o Hinemoana Halo.
He kaiārahi Māori, o Te Moananui a Kiwa hoki i whakatakoto i a Hinemoana Halo ki tēnei hui taumata o te ao, hei whiringa toitū mō te pūnaha hauropi ki tai, ā kua whakaemi i ngā mahi a ngā iwi mō te kaupapa.
“Ko te reo Māori me puta ki ēnei hui ā ao, kaua noa iho mō te whakareo i ngā whakaaro o te iwi Māori o Aotearoa anahe, engari mō ngā moutere o Te Moana nui a Kiwa whānui anō hoki,” te kī a Edwards.
Ko te tumuaki tuarua o Conservation International Aotearoa, ko Mere Takoko hoki i tae atu ki te hui i te UAE, ā hei tāna, i te huringa o te āhuarangi hei take nui e hurihuri ana i te ao, koinei te wā ki te whakamahi panonitanga.
“I te kakenga haere o te mahanatanga o te moana ki taumata noa atu, kei te nui haere te whakahau ki ngā rangatira o COP ki te tautoko i ngā uaratanga o ngā iwi taketake, mā te tiaki i te ao tūroa hei rongoā toitū, whai hua hoki, i mua i te takanga o ngā tohora, o te ao hoki ki tua o Nukutaurua,” e ai ki a Takoko.
Te hoko i ngā hua hauhā o te ao tūroa
Hei tā Takoko, ko Hinemoana Halo ehara i te kaupapa whai hua mō te nāianei noa iho, engari mō te āpōpō o ngā takutai moana, o te tini a Tangaroa anō hoki.
“I raro i te tauira a Hinemoana Halo, ko ngā rōpū, tāngata hoki e hiahia ana ki te whakaheke i ōna tapuwae hauhā, ka hoko hua hauhā mō te ao tūroa i te tahua, ā ka whakangaohia anō tērā ki te whakaora anō i ngā rerenga rauropi, ka nui ake hoki ngā wāhi o te moana e tiakina ana,” hei tāna.
Ko Fealofani Bruun, he wahine whakatere waka nō Hāmoa, ā hei tāna, ko ngā mea pērā i te waikawa i te moana, he māharahara nui i te huringa o te āhuarangi.
“E ngana ana mātou ki te rangahau i ngā taupori o ngā tohorā, ehara ko ngā tohora noa iho, engari ko ngā momo kararehe nukunuku katoa ka noho tahi nei me tātou i te whenua, i te moana.”
Ko ngā iwi taketake huri noa i Te Moana nui a Kiwa kua tīmata ki te aromatawai, ki te kohi raraunga hoki e ora tonu ai ngā tohorā, e ū tonu ai ngā mahi atawhai i ngā pūnaha rauropi ki tai.
“I roto i tēnei whakaterenga a Hinemoana Halo, e whai ana mātou ki te aroturuki i ngā hekenga a ngā tohorā, ki te whakapūmau hoki i wā rātou hokinga nui mai,” te kōrero anō a Bruun.
Te kaha o te tautoko
Tua atu i te tautoko a Kīngi Tūheitia, he ariki atu anō, he hunga whai rawa hoki kua aro ki tēnei kaupapa, pērā i a Kīngi Charles, i a Tā Richard Branson hoki.
“E koa ana mātou i ngā pūtea tautoko kua riro i a mātou i tēnei wā. I te mea, ko ngā hua ehara i te mea he oranga mā tātou o tēnei whakatipuranga noa iho, engari ka haere tonu mā ā tātou uri, matua rā mō te taiao me tō tātou hononga tuku iho i ngā mātua ki a ia,” te kī a Edwards.