Kua rewa te ahurei kirikiti mō te hunga rangatahi ki Tāmaki Makaurau, he ahurei whakatairanga i ngā painga o te kirikiti ki te rangatahi, ka mutu, ko te iwi Māori me ngā iwi o Te Moananui ā-Kiwa tētahi aronga matua.
He mea tīmata te ahurei kirikiti rangatahi i te tau 2022/2023 ki Tāmaki Makaurau, ā, ki konei whai wāhi ai ngā kapa rangatahi Māori, taitamatāne mai, taitamawahine mai anō hoki, ki te whakataetae atu ki ngā kapa o Te Moananui ā-Kiwa.
Ko Pōtiki Morrison-Hamilton tētahi o ngā kaitākaro Māori kua uru atu anō ki te kapa rangatahi Māori.
E 17 ōna tau, ā, he tamaiti e ako ana ki te kura kaupapa Māori o Te Whānau Tahi ki Ōtautahi.
Hai tāna ko te tino wawata kia kite ko te reo Māori e rērere ana, e whakamahia ana i te hākinakina nei.
“Kia reo Māori katoa. Kia tākaro ngā Māori, ka tiro rātou ki te tīwī, ā, e mea ana ‘he hongehongeā tēnei kēmu,’ engari kāre anō rātou kia tākaro.”
Kua roa a Pōtiki e tākoro kirikiti ana, nōna e tamariki tonu ana, ā, hai tāna, ko te ahurei nei tētahi atamira kia whakaaturia ngā mahi a te Māori.
“Ko te whakawhanaungatanga ki te taha o ēnei tama, ko au anake e taea ana te kōrero i te reo, engari, kei te hiahia ahau ki te whakaako i ēnei, ko tōku whānau.”
Hāunga rā te wāhi ki te hunga taitamatāne, me whai wāhi hoki ngā taitamawāhine.
Hai tā Pōtiki, he nui ngā hua i tā te Māori uru atu ki te kirikiti, waihoki, kāore he mahi i tua atu i te whakatoi me te whakawhiu hoariri.
“Ka taea te kōrero i tō ake tiko, ki tērā atu tīma, ki ngā Pākehā. Ko te mea pai ki ahau ko te patua te pōro ki tōna kotahi rau mita.”
Hai āpōpō mutu ai te ahurei nei, ā, ko ngā ahurea te toa o te hui.
