Ko te reo karanga o Te Poho o Rāwiri, i Tūranga e haere tonu ana ki te makiu tāngata, rātou ka hari i ngā roimata, i ngā hūpē me ngā mihi ki runga i a Kahurangi Iritana Tāwhiwhirangi e takoto tiraha ana.
Ko mahara te hoa haere o tangi hotuhotu, o roimata heke, ā e mau tonu ana te tini tāngata ki ngā maharatanga ki a Kahurangi Iritana.
Hai tā tētahi o āna tauria o mua, tā Henare O’Keefe, ko te aroha i whakatōngia e Iritana, te aroha ka puta mai i te wā ka whakaarohia a ia.
“It was an absolute privilege, an absolute honour. Her and my mum were also dear friends and I just love her very much.”
Ko tētahi o ōna hoa tata, hoa whakaora reo, o Tā Tīmoti Karetu i whakahoki anō ōna maharatanga ki a Iritana, me tērā momo o te tangata kua ngaro nei.
I roto i tētahi pōhi kua whakairia e te pukamata o Kauwaka, kāore āna mahi e mate i tōna taha.
“Ko tōna momo ka ngaro, engari ko te kaupapa, kua oti kē te whakaritea e ia kia tū kaha tonu, kia tū kaha tonu, kia tū kaha tonu. Me kī tāua, ahakoa kua ngaro te poutokomanawa o te whare o te Kōhanga Reo, e kore te whare e hinga. Ka tū kaha tonu nā te mea, ko ngā pou i titia ki te tūāpapa o te kaupapa, ko te reo tērā.”
Ko tētahi mema o mua o te Kōhanga Reo Trust, nā Iritana hoki a ia i tō atu ki te kaupapa, ko Phillip Marshall, e maumahara ana ki te momo pērā i a Iritana.
Hai tāna ko te mana o Iritana, tētahi e mau tonu ana i ngā uri whakaheke.
“I tīmata au ki te mahi i tana taha i te tau 1979 mō te tari Māori, mai i tērā wā ki naiānei, kei konei tonu au ki tana taha.”
Ā ko te mana me te kaha o te wahine nei e whātoro atu ana ki ngā tāngata katoa.
“Koirā tāna, e taea ai te kōrero ki ngā pākeke, koroua, tamariki, taiohi, Kīngi. She could cross all of those barriers to talk to anybody.”
Ka mihia ia e te ao tōrangapū
I roto i ngā tau i tae atu ia ki te ana o te raiona, ki te whare pāremata tohe ai i ngā kaupapa Māori maha. Nā whai anō ngā mihi a ngā mema tōrangapū ki a ia.
Ahakoa kei Waitangi te nuinga o ngā mema tōrangāpū, me ngā upoko o ngā iwi, e rere tonu ana ngā mihi aroha ki te kuia e takoto tiraha nei.
“A force of nature” - koina tā te kaiarahi o te pāti Act, tā David Seymour ki a Kahurangi Iritana. Hei tā Seymour, he kaitautoko i a i ngā kura hourua. Hei āpiti, hei tāna he taringa whakarongo a Kahurangi Iritana mōna.
Ko te minita whakawhanketanga Māori, ko Tama Potaka hoki tērā e rangona ana te pōuri me te mamae o tēnei ngarohanga ake o te iwi Māori.
“He wai kei aku kamo i te rangona i hinga ia. Engari, 95 hoki tana pakeke, whakatairangatia tōna oranga me ōna koha ki a tāua.”
E okioki e kui It is hard to fathom the loss of someone like Dame Iritana. She was a presence wherever she went whether...
Posted by Peeni Henare on Monday, February 3, 2025
E ai ki te minita ō mua mo Whānau Ora, ki a Peeni Henare i whakatairanga i ngā mokopuna mō te hemo tonu atu. Ko tōna hinengaro koi ka maumaharatia.
Te Paeroa
Hei te ata o Taite ka kawea te taonga o te mate ki tōnā ūkaipo o Porourangi Tāwhiwhirangi. Ka whakaeke atu i te marae o Rāhui hei te takiwā o te iwa karaka. Hei te ata o te Paraire ka tākinga ngā karakia whakamutunga mōnā.
Ko Tūranga FM me Radio Ngāti Porou ka whakapāoho i te hui mate.
Nō reira rā e kui, mā wai te whāruarua e whakīkī ana? Mā tō ope kōhanga reo pea, mā āu mokopuna pea? Tē taea e tātou te reanga o te naiānei te whakakīkī i ngā āputa kua mahue mai nei i a koutou ko tō momo o te tangata. Heoi anō, ka kawea tonutia ngā mahi kua oti i a koe, i a koutou te hunga i te pō ki Hawaiki Reo Rere, ki Hawaiki Reo Ora. Okioki rā e Iri.
