He taunaki i te kauhau a Kīngi Tuheitia te mahi a te rōpū haka toa ō-mua o te motu a Taniwharau i te hui Koroneihana i te rā nei.
He whakangahau i te tini, i te mano i whakaōpeti atu ki Tūrangawaewae Marae i te rā nei, me te mea nei, kāhore anō kia kite tūturu nei a Taniwharau mō te tekau tau.
Tā Jason Kereopa o Taniwharau, "I moe nei i te rirohanga atu o tō tātou Arikinui a Te Atairangikaahu, tau whakamutunga rua mano mā whitu tū ai te kapa ki roto i a Te Papaioea nō taua wā tae noa mai ki tēnei wā kua moe tēnā o ngā rōpū. Tēnei te whakaoho ake."
He whakahonore i ngā mahi a ōna mema kua mate i roto i te tau. Ko tētahi ko Kiritokia e te Tomairangi Paki, tētahi toki o te ao a Hine-rēhia me te kaiako o mua o Taniwharau.
Ko tā Kingi Kiriona o Te Iti Kahurangi e haka ana mō Taniwharau i te rā nei, "Kua kotahi mai nei ngā kapa katoa o Tainui i raro i te maru o Taniwharau me te tangi ake ki a Tomairangi kāre i waenganui i a tātou i tēnei rā. Heoi anō mā ōnā waiata me ngā mahi nei e ora mai ai ki te pae tata o te whakaaro."
Tā Jason anō, "Ko te mōhio tātou e noho pani ana tō tātou Whare Ariki, tō tātou Kīngi."
"Ngā poutoko o tō mātou kapa o Taniwharau kua hinga nei, tīmata ai ki tēnā o ngā ruruhi, te nuinga o te wā e tū ana mō te kapa ko ia te manawa o te aroaroā kapa ko Te Oraiti kei te tangi tonu, kei te tangi tonu.
"Whai muri i a ia ka mātai te titiro ki a Te Arawa waka ki tērā o tō tātou nei koroheke a Napi me te huhua o āna mahi i roto i tō mātou kapa o Taniwharau. Te Arawa waka kei te tangi tonu, kei te tangi tonu.
"Ka hoki mai ki te wā kainga ki a Waahi Pā anā ko Tomairangi tēnā i te timatatanga o tēnei tau, ko taku karanga pāpa ko Tohehaia i roto i ngā marama kua tata nei."
Ko te rōpū tēnei a Te Arikinui Te Atairangikaahu, ā, ko Taniwharau anake o roto o Tainui, i wikitoria i tētahi taitara matua o te motu. I te tau waru tekau mā tahi, ki te whetiwara Poronēhia ka whakawhiwhia te taonga o Duncan McIntyre.
NGA MIHI: https://www.facebook.com/Kiingitanga/